Irailaren 25 eta 26ko asteburuan, Hendaia martxan jarriko da bere kultur denboraldiari hasiera emateko. Mediatekak, Mendi Zolan kulturguneak, Gaztelu Aretoak, Errepublika plazak eta Les Variétés zinegelak ateak irekiko dituzte bi egunez, asteburu honetan hasi eta 2027ko udaren hasierara arte iraunen duen denboraldiari hasiera emateko.
Antzerkia, dantza, musika, zirkua, erakusketak, literatur solasaldiak eta haurrentzako proposamenak elkarren segidan izanen dira herriko hainbat gunetan, kultur denboraldiaren lehen ikuspegia eskaintzeko.
Irailaren 25a, ostirala
Mediatekak, 18:00etan, Marie-Hélène Errecart gela inauguratuko du. 1980ko hamarkadan kulturaz arduratu zen auzapezordea izan zen Errecart, Hendaiako kultur bizian arrasto sakona utzi zuena. Haren ekimenei zor zaizkie, besteak beste, 1985ean Antzerkiaren Maiatza festibala sortzea —gaur egun herriko kultur hitzordu nagusietako bat—, 1988an Les Variétés zinegelaren zaharberritzea eta 1992an inauguratu zen udal mediatekaren egitasmoa ere.
Gaualdiak Gaztelu Aretoan jarraituko du, 18:30ean, kultur denboraldiaren aurkezpenarekin. Horren ondotik, 20:00etan, Jurgi Ekizaren kontzertua izanen da, «Argitzala» disko berria aurkezteko. 21:30ean, Alexandre Duran Davisen «Insula» zirku-ikuskizuna eskainiko da beheko zabalgunean. Ikuskizun hau EKO – Pirinioetako Zirkoa europar egitasmoaren baitan dago, eta FEDERen eta Interreg-POCTEFA programaren bidez finantzatu da.
Irailaren 26a, larunbata
11:00etan, Mediatekan, Ma Fabrique de Mots-eko Nathaliek kontatutako ikuskizun bat aurkeztuko da.
14:00etatik aitzina, Errepublika plazan, margolariak izanen dira pintzel eta mihise artean. Ondotik, 14:30ean, «Te voilà petit cœur!» irakurketa animatuak izanen dira, 3 urtetik gorako haurrentzat. 17:00etan, Dantza Hirian jaialdiak «Nondik» eta «Sangre y clorofila» ikuskizunak aurkeztuko ditu, eta 17:30ean, Attention Paillettes konpainiaren «Ego together» ikuskizunaren estreinaldia izanen da, denak dantzan jartzeko.
Azkenik, egunari amaiera emateko, Les Variétés zinegelan, 19:00etan pintxo-potea eta 19:30ean zine-solasaldi berezi bat izanen dira «Pour le chant» irudirik gabeko sorkuntza soinudunaren inguruan. Dokumentalak kurloen udazkeneko migrazio-bidean bidaia egitera gonbidatzen gaitu. Txorien kantuekin, hizkuntzak eta zeharkatutako eskualdeetako azentuak nahasten dira, ahotsa bera paisaia bilakatuz.
Luzaroago iraunen duten bi erakusketa
Goian aipatutako ekitaldi guztiez gain, bi argazki-erakusketak osatuko dute kultur denboraldiaren hasiera hau. «Regards croisés #2», Argia kolektiboak antolatua, Mendi Zolanen urriaren 10era arte; eta Dantza Hirianek proposatutako «Oroitzapenak» erakusketa, Mediatekan, urriaren 8ra arte izanen da ikusgai.
Harpidetza-kanpaina abiatu da
Kultur denboraldiaren hasierarekin batera, abonamendu-kanpaina ere zabalik da, denboraldi osoko ikuskizun eta kontzertuetan prezio murriztuez baliatzeko. Txartela eskuratzeko, Kultura eta Bestak Zerbitzuko taldearekin harremanetan jartzea gomendatzen da.
